42% da la populaziun svizra vul pir puspè visitar occurrenzas culturalas, cura che la crisa da corona è definitivamain surmuntada. Quai demussa ina retschertga ch’è vegnida fatga la fin d'avust per incumbensa da l’Uffizi federal da cultura e da la Conferenza dals incumbensads dals chantuns per dumondas culturalas.
I dat dentant differenzas davart la purschida dad occurenzas culturalas. Cun visitar museums u exposiziuns vulan 36% dals dumandads spetgar fin il 2021. La cumpart da quels che vulan anc spetgar cun visitar concerts, teaters u l'opera munta dentant a 43%.
La tenuta è sa midada
Uschia è la retegnientscha creschida: L’entschatta dal zercladur vulevan numnadamain be 22% da la populaziun desister dad occurrenzas culturalas enfin la fin da la crisa. En pli ha la retschertga er mussà che las mesiras da protecziun cunter il coronavirus e l’agid finanzial dal maun public per il sectur da la cultura vegnan sustegnids da la gronda maioritad.
La retschertga è vegnida fatga tranter ils 20 d'avust ed ils 2 da settember. Participà a la retschertga han 1197 persunas e fatg la retschertga ha l'agentura L’Oeil du Public (Suisse).