56% da la populaziun svizra è per gronda part cuntenta cun la politica d'energia. Las bun milli persunas dumandadas mettan er cleras prioritads sch'i va per la dumonda tge ch'è il pli impurtant per la producziun da forza electrica:
- segirar il provediment (53%)
- producir neutral al clima (25%)
- offrir in pretsch d'electricitad pajabel (21%)
Per pudair augmentar la producziun da forza electrica indigena èn 67% da las persunas era prontas d'acceptar persuenter deficits tar la protecziun da l'ambient. E tuttina spetgan 59% ch'ins tracta a moda spargnusa surfatschas anc betg surbajegiadas.
Naginas novas ovras atomaras
Er tar la dumonda tge tecnologias che vegnan ad esser las pli relevantas en l'avegnir, è la successiun clera: La forza idraulica e la fotovoltaica vegnan numnadas il pli savens, suondadas da la forza da vent. Adina pli impurtantas daventan dentant er ulteriuras energias regenerablas, sco per exempel la geotermia, biogas ubain idrogen. Sch'i va per ovras da gas sa mussan las persunas dumandadas indecisas – la construcziun da novas ovras atomaras percunter n'è nagina opziun.
La Svizra duai garantir in provediment segir surtut cun energias regenerablas. Ina gronda maioritad (85%) èn da l'avis che quai saja ina protecziun da l'ambient pratica e 70% èn perfin persuenter da restrenscher il dretg da far recurs per ch'il svilup giaja pli spert.
Nua bajegiar?
Indrizs solars èsi il meglier d'installar sin stabiliments existents, sco per exempel sin tetgs, fatschadas, autostradas u mirs da fermada. Lais da fermada vulessan Svizras e Svizzers bajegiar il pli gugent là nua ch'igl era ina giada in glatscher ubain nua che quel lieua causa la midada dal clima. E malgrà che las persunas dumandadas per la retschertga vesan la forza da vent sco necessaria, beneventa be stgars la mesadad rodas da vent ch'ins vesa davent da l'agen balcun.
