Las ovras atomaras svizras han producì pli pauca electricitad l’onn passà. En emprima lingia haja quai da far cun las lavurs da revisiun da l’ovra atomara da Leibstadt. Quai scriva Swissnuclear, la federaziun dals gestiunaris da las ovras atomaras svizras.
Revisiun da l'ovra a Leibstadt
La revisiun annuala da l’atomara en il chantun Argovia ha cuzzà radund in mez onn ed uschia in mais pli ditg che previs. Cunzunt il remplazzament dal sistem per far circular l’aua en il reactur haja duvrà dapli temps, scriva Swissnuclear. En consequenza haja l’ovra da Leibstadt mo pudì producir mez uschè bler electricitad sco l’onn avant. Dapi december è il reactur puspè cumplettamain en funcziun.
Bunamain 19 milliuns uras megawatt
En tut han las ovras atomaras da Beznau, Gösgen e Leibstadt producì 18,6 milliuns uras megawatt il 2021. Quai èn radund 20% pli pauc che l'onn avant. Malgrà quai hajan ils quatter reacturs furnì bunamain 25% da l'electricitad che la Svizra haja duvrà il 2021, uschia Swissnuclear vinavant.
