Ils 12 da settember ha la gruppa da perscrutaziun da l’Universitad da Turitg preschentà il studi davart ils abus sexuals en il conturn da la baselgia catolica. Igl èn vegnids identifitgads 1002 cas. Quai è l'emprim studi cumplet ed independent en Svizra che mussa las dimensiuns dals ultims 70 onns. Quai è dentant mo ina cifra per entant, di Monika Dommann che ha manà quest studi.
Bleras persunas èn idas cun lur secret en fossa, n’han mai fatg annunzias. La baselgia n’ha betg inizià ina procedura – quai vul dir, i n’ha betg dà actas. Perquai è quai propi mo il piz da la muntogna da glatsch.
Reacziuns hai dà da Joseph Maria Bonnemain, l'uvestg da Cuira, ch’è la fatscha da las organisaziuns catolicas che han incumbensà il studi. El na saja betg surstà, dentant fetschia mal d'udir questas dimensiuns.
Studi cun grond effect
Bleras persunas èn extradas da la Baselgia catolica Svizra suenter ch'ils cas èn vegnids enconuschents. En la citad Lucerna èn quai per exempel stadas 270 persunas, l’onn avant eran quai da quest temp 65 persunas. En il Grischun èn extradas durant il settember 100 persunas. L'auter effect è che ulteriuras victimas èn s'annunziadas, dal settember enfin il december, e quai en tut 91 persunas.
Quest studi è in emprim pass. La gruppa da perscrutaziun da l’Universitad da Turitg appellescha da s’annunziar sch’ins sa insatge, sch’ins era u è pertutgà dad abus sexual en il conturn da la baselgia catolica. Dal 2024 fin il 2026 perscrutescha la gruppa vinavant.
