Tar il concern da latg Emmi surpiglia ina dunna grischuna il timun a partir dal 2023. Ricarda Demarmels ch'è creschida si ad Andeer succeda ad Urs Riedener, ch'ha manà il concern 14 onns.
El duai daventar nov president dal cussegl d'administraziun, uschia ha communitgà Emmi. Actualmain è Ricarda Demarmels scheffa da finanzas dal concern che dumbra passa 9'000 collavuraturas e collavuraturs. La Grischuna ha studegià economia da manaschi a l'Universitad da Son Gagl.