Siglir tar il cuntegn

Header

Navigaziun

cuntegn

Svizra Richemont crescha grazia acquisiziuns

Il concern da products da luxus svizzer, Richemont, ha fatg l’onn passà ina svieuta da 14 milliardas euros. Quai è bunamain in quart dapli che anc il 2017.

Gudogn è sa dublegià

Il gudogn è sa dublegià sin 2,79 milliardas euros. Qua ha Richemont profità d'ina nova valitaziun da l'aczia da Yoox. Questa nova valitaziun ha gì l'effect da 1,4 milliardas.

Motiv per l’augment èn cunzunt cumpras

Richemont investescha ferm en lur activitads d'online, quai per pudair vender en futur dapli bischutaria ed uras en l'internet. Richemont ha surpiglià il commerziant d'online Yoox Net-a-Porter e cumprà la plattafurma britannica Watchfinder.com.

Era senza acquisiziuns è la svieuta dal concern creschida, e quai oravant tut en la China. Bischutaria ed uras da las marcas sco Cartier, IWC, Piaget u Jaeger LeCoultre chattan en China buna accoglientscha. Dentant era en ils Stadis Unids è la svieuta creschida, damain bain marschan ils affars en Europa.

RR novitads 11:00