Ringier, SRG e Swisscom fan ensemen reclama

Ils concerns Ringier, SRG SSR e la Swisscom lavuran en l’avegnir pli stretg ensemen cura ch’i va per far reclama. Ellas fundeschan ina nova firma communabla per far reclama cun lur purschidas publicisticas e per colliar lur plattafurmas da reclama.

Ringier, SRG SSR e la Swisscom vulan rinforzar cun la nova firma il martgà da reclama svizzer en la concurrenza globala. Bild in Lightbox öffnen.

Legenda da maletgs: Ringier, SRG SSR e la Swisscom vulan rinforzar cun la nova firma il martgà da reclama svizzer en la concurrenza globala. Keystone

La nova firma da reclama duai sa drizzar pli fitg als basegns dals clients da reclama e da las medias svizras, sco era rinforzar il martgà da reclama svizzer en la concurrenza globala. Sco interpresas da concurrenza vegnan numnads Google e Facebook che hajan l’onn passà cuntanschì ina cumpart dal martgà da reclama digitala da 50%.

Publisuisse vegn cumplainamain integrada

La Swisscom contribueschia tranter auter sias cumpetenzas da la tecnologia, Ringier e la SRG ils dretgs per lur vastas purschidas da medias en la nova firma, hai num en ina communicaziun communabla. Uschia integrescha per exempel la SRG l’interpresa Publisuisse cumplainamain en la nova firma. La Publisuisse fa tranter auter exclusivamain reclama cun ils cuntegns publicistics da la SRG SSR.

A partir da l'emprim quartal 2016

Sche tut va tenor plan vegn la nova firma a partir da l’emprim quartal 2016 a vegnir activa. I vegn ad esser ina societad d'aczias cun bun 290 collavuraturs. Il CEO da la nova firma vegn Martin Schneider ad esser, ch'è uss anc schef da la Publisuisse, e president dal cussegl d'administraziun daventa il schef da la Ringier, Marc Walder.

Il directur da la SRG, Roger De Weck ed il schef da la Swisscom, Urs Schäppi vegnan ad esser commembers dal cussegl d'administraziun.