Siglir tar il cuntegn

Header

cuntegn

Ripersiella hibisci A la tschertga d’in plugl nuschaivel

Ripersiella hibisci – uschè sa numna in plugl nov che fa ussa la runda en Svizra e infectescha flurs sco oleanders, rododendrons u hibiscus. Il problem è pli grond che sminà l’entschatta.

L’emprima giada ha la Confederaziun percurschì il plugl l’entschatta da zercladur. Lura saja ina furniziun cun radund 50 plantinas da flurs da «callistemon» arrivada via l’Italia en Svizra. Tenor l’Uffizi federal d'agricultura èn intginas da quellas plantinas stadas infectadas, uschia ch’ils passagiers zuppads han pudì entrar en Svizra.

In animal pitschen dentant nuschaivel

Il plugl ch'è be intgins millimeters grond sa tegna ferm vid las ragischs da la flur e frainia qua tras il process da crescher da la flur, declera Jonathan Fisch da l'Uffizi federal d'agricultura. Silsuenter daventa la planta melna, avant ch’ella crappa. Cunzunt pertutgadas èn flurs sco oleanders, rododendrons, callistemons u hibiscus.

audio
In nov parasit da plantas fa quitads
ord Actualitad dals 12.07.2021.
laschar ir. Durada: 2 minutas 56 Secundas.

Il problem crescha

Sco reacziun haja il Servetsch federal per la protecziun da las plantas fatg in appel a la populaziun da controllar lur flurs sin tals plugls. En curt temp hajan els survegnì radund 300 annunzias. Da quellas sajan 40 stadas positivas. Durant l’appel ha il servetsch federal dentant percurschì ch’il furnitur da l’Italia importa era via la Germania en Svizra. Experts ed expertas dal servetsch sminan perquai, ch’il dumber total da plantinas da flurs infectadas da «callistemon» pudess crescher sin 150.

Appel d'agid

Tenor Jonathan Fisch saja uss impurtant da chattar spert tut ils parasits. Perquai vul ins uss render attent butias da flurs e centers d'orticultura sco er persunas ch’han avant curt cumprà talas flurs. L’Uffizi federal per agricultura restia optimistic, ch’ins vegnia bainbaud a schliar quest problem.

Co reagir tar in cas da suspect

Avrir la box Serrar la box

Betg dismetter la flur infectada en il rument u cumpost, mabain annunziar il cas tar il Servetsch federal per la protecziun da las plantas.

Numer da telefon: 058 462 25 50

Email: phyto@blw.admin.ch

Tranter auter èn ins a la tschertga da plantinas da flurs che portan il suandant numer IT-19-0327. Quels sajan vegnids vendids tranter il mars ed il matg 2021.

RTR actualitad 11:00

Artitgels legids il pli savens