Dapi mais è la directura da sanadad dal chantun Argovia en la critica pervi da ses stil da manar. Pliras partidas renfatschan a Roth da betg manar bain ses uffizi.
La critica vegn er da sia atgna partida, da la PPS. Quella ha pretais da sia cussegliera guvernativa da manar meglier fin la stad u da sa retrair da ses post.
Roth è consternada da singuls caders da la PPS
Uss ha Franziska Roth annunzià che ses departament per sanadad e fatgs socials saja sin buna via. Ella saja dentant consternada dal sa cuntegnair offendent da singuls caders da la partida. Perquai mainia ella vinavant ses uffizi sco politicra senza partida.
Reacziun da PPS sut il titel «Senza Speranza»
La reacziun da la PPS dal chantun Argovia sin l’annunzia da Roth è chargiada. En sia communicaziun a las medias scriva la PPS che a Franziska Roth manchian «voluntad, interess e talent» per pudair satisfar en ses uffizi.
Co ella veglia dumagnar da manar ses departament senza sustegn d'ina partida saja nunchapibel. Cun quest pass na sajan schliads nagins problems, scriva la PPS.
Franziska Roth è dapi il cumenzament da l’avust 2017 la directura da l’uffizi da sanadad da l’Argovia.
RR novitads 12:00+