Siglir tar il cuntegn

Header

Navigaziun

Dus panzers dal concern Ruag
Legenda: Il Cussegl federal vul privatisar la partiziun internaziunala da la Ruag. Keystone
cuntegn

Svizra Ruag duai vegnir privatisada parzialmain

Il Cussegl federal vul privatisar cumplettamain la partiziun internaziunala dal concern d'armaziun e tecnologia Ruag.

  • Il Cussegl federal vul privatisar parzialmain la Ruag
  • La partiziun internaziunala duai ir cumplettamain en mauns privats
  • La Ruag duai vegnir partida en ina cumpart internaziunala (Ruag internaziunal) ed ina cumpart Svizra (MRO)
  • Sche pussaivel il 2021 duai il concern entrar en la bursa

Per il concern d'armaziun e tecnologia ch'è lià fin qua a la Confederaziun duai sa midar bler en il futur. Il Cussegl federal ha decis, ch'el veglia privatisar cumplettamain la partiziun internaziunala. Gia la stad passada aveva la regenza annunzià, che las partiziuns ch'èn en servetsch per l'Armada svizra duajan vegnir separadas da la partiziun internaziunala. Entras quest pass veglian ins sparter las finanzas ed ils sistems d'informatica da las partiziuns. Quai auzia la segirezza, uschia il Cussegl federal.

Privatisaziun pass per pass

Perquai che l'interess public da posseder ina tala interpresa na saja betg pli dà, veglia la regenza sa separar da la partiziun internaziunala. Plinavant manchia era la basa legala per ina participaziun vid in tal concern. Cura che la privatisaziun duai succeder n'è anc betg cler. En il cas ideal duai il concern entrar il 2021 en la bursa. Tut duaja dentant succeder pass per pass.

Plinavant vul il Cussegl federal vender la partiziun da muniziun Ammotec. La segirezza da l'Armada svizra na saja entras quest pass betg periclitada. Gia oz sto la Svizra cumprar differenta muniziun en l'exteriur. Ina vendita saja dentant mo ina opziun sche la fabrica da muniziun restia a Thun.

Partiziun naziunala resta

Betg en dumonda vegn per il Cussegl federal ina vendita da la cumpart svizra da la Ruag, la MRO. El veglia vinavant restar singul acziunari per la MRO. Tar ils pensums da la MRO tutgan tranter auter il mantegniment e la reparatura dal material da l'armada sco era il mantegniment da sistems relevants sco la flotta da jets da cumbat F/A-18.

RR novitads 14:00