La situaziun da corona saja seriusa. Blers ospitals sajan gia al limit. Bain hajan plirs chantuns gia prendì mesiras rigurusas per impedir ch'il coronavirus sa derasia, ma la populaziun na sa deportia betg lasuenter, uschia il president da la Task-Force scientifica Covid-19, Martin Ackermann.
Stretgas en ils ospitals
Sch'i giaja vinavant sco enfin qua, na possian betg pli tut ils umans che duvrassian agid medicinal er survegnir quel, ha ditg Andreas Stettbacher, delegà dal Cussegl federal per il servetsch sanitar coordinà. El fa quint ch'i dettia en las proximas duas emnas stretgas en ils ospitals, local er gia avant. Sch'ins na vegnia betg da sbassar l'augment d'infecziuns.
5949 infecziuns novas – 89 en il Grischun
167 persunas han stuì ir en l'ospital suenter in'infecziun cun corona e 16 èn mortas. En media èn 23 da 100 tests ch'èn vegnids fatgs la davos'emna stads positivs. En il Grischun hai dà 89 novs cas d'infecziun. Actualmain sa chattan 461 persunas en isolaziun, 1043 en quarantina e 27 en l'ospital.