Il turissem en Svizra è confruntà cun perditas massivas pervia da la crisa da corona: Cumpareglià cun l'onn avant è la svieuta enfin 95% pli bassa, ha ditg Erik Jakob dal secretari statal per economia SECO oz en la runda d'experts a Berna. Guardà sin l'entir onn stoppia la branscha quintar cun enfin 35% pli pauca sperdita.
Il SECO quinta ch'i duria ditg enfin ch'il turissem possia sa revegnir:
Ina normalisaziun da las dumondas è pir da spetgar l'onn 2022.
In factur psicologics vegnia ord vista dals consuments latiers – fin che la tema da ristgs da sanadad saja surmuntada e ch'i vegnia propi puspè viagià dapli. Vinavant vegnia il ferm franc svizzer danovamain ad avair effects negativs.
Program d'impuls
La Confederaziun examineschia ulteriuras opziuns per rinforzar il turissem, uschia Erik Jakob vinavant. L'organisaziun Svizra Turissem ha preschentà in program d'impuls da 40 milliuns francs - quel discutescha la confederaziun e las cumissiuns dal parlament federal sco proxim.
I giaja surtut per promover il turissem svizzer:
In program per promover la dumonda stuess en ina emprima fasa avair en mira la promoziun dal turissem intern
Sin la dumonda cura che las purschidas turisticas sajan puspè accessiblas, ha el accentuà che la branscha stoppia agir communablamain. I na gidia nagut d'avrir per exempel in'ustaria sin ina muntogna sche la pendiculara na saja betg averta.
