Las autoritads han rapportà en ina conferenza da medias da las investigaziuns e l’arrestaziun dal assassin presumtiv.
Tar il delinquent sa tracta i dad in um da 33 onns, in student svizzer che abitescha a Rupperswil. El n’haja betg gì ina relaziun cun sias victimas.
Naginas relaziuns cun las victimas - interess finanzials e sexuals
Las raschun per il murdraretsch sajan finanzialas e sexualas, ha Philipp Umbricht, il procuratur public suprem, infurmà.
En il decurs da l’infurmaziun a las medias han las autoritads detg, ch’il assassin presumtiv haja gì in interess sexual vi dal mat pli giuven da la famiglia ed haja perquai tschernì sias victimas. L’um haja planisà concretamain, da mazzar tut las persunas en la chasa e da dar suenter fieu a quella.
L'um arrestà haja planisà ulteriurs malfatgs
Enpli haja l’um gia planisà ulteriurs malfatgs. Pervi che quai è vegnì enconuschent a la pulizia ha quella sa decis dad agir uschia svelt co pussibel. In gievgia è el vegnì arrestà. Avant quest malfatg na saja el ni dà en egl a la pulizia, ni haja el debits u deficits psichics.
Las investigaziuns cuntinuan - dentant betg en la publicitad
Na betg respundì han las autoritads al mument la dumonda, schebain il assassin presumtiv haja agì sulet. Ellas na vegnian betg a respunder tut las dumondas or da raschuns tacticas.
RR novitads 16:00