Siglir tar il cuntegn
cuntegn

Svizra Russia n’ha betg gust da la Svizra

Ensemen cun l’ambassadur svizzer hajan las autoritads russas a Moscau er cità l’ambassadur dals Pajais Bass, rapporta l’agentura da novitads svizra SDA.

In scienzià vi da la lavur.
Legenda: Labor a Spiez – là vegn lavurà vi da la segirezza biologica sut las pli autas prescripziuns da segirezza. Keystone

Las autoritads russas sa lamenteschan da «rinfatschas nungiustifitgadas» envers la Russia – tenor las qualas agents russ hajan vulì spiunar ora il labor da chemia a Spiez e l'agentura mundiala dad anti-doping a Losanna.

A l’ambassadur svizzer Yves Rossier saja vegnì dà d’encleger che remartgas formuladas da maniera talmain ostila, pudessan donnegiar marcantamain la relaziun tranter Berna e Moscau, scriva la SDA.

Betg accredità diplomats russ

Il minister da l’exteriur svizzer Ignazio Cassis aveva discurrì il glindesdi dad activitads extraordinarias da la Russia. En quel connex sajan gia intgins diplomats russ betg vegnids accreditads durant las ultimas emnas. Ina crisa diplomatica veglia Cassis dentant evitar sche pussaivel. L’emna proxima sa scuntra el persunalmain cun il minister da l’exteriur russ – e probablamain vegn l’affera lura ad esser in dals temas.

Dus Russ eran vegnids arrestads la primavaira en il Pajais Bass pervi dal suspect da vulair vegnir en Svizra per spiunar en in Labor Spiez. Quest labor da la Confederaziun aveva fatg analisas en il cas da l’agent russ Sergei Skripal e sia figlia. Quels dus eran vegnids tissientads en Engalterra.

RR novitads 06:00+