Siglir tar il cuntegn

Header

cuntegn

Svizra «Sa concentrar sin las fermezzas, sch’i buglia enturn enturn»

El ha elegì il port dal Rain a Basilea, perquai che quel exprimia las qualitads tipicas da la Svizra, di il president da la Confederaziun Johann Schneider-Ammann. Dentant i dettia per quest onn trais pensums da chasa ch’ins stoppia schliar communablamain.

«Suveran, entamez l’Europa e collia economicamain cun il mund.» Quai è la Svizra, di il president da la Confederaziun, Johann Schneider-Ammann. El ha elegì per ses pled da Bumaun il port dal Rain a Basilea: Quel exprimia las qualitads tipicas da la Svizra.

L’ultim onn haja purtà blera malsegirezza: uschia per exempel il ferm franc svizzer e sco ultim hajan er il terror, ils fugitivs e conflicts mussà con spert che crisas possian daventar dramas. «Sch’i buglia enturn ed enturn, èsi bun da sa regurdar da las fermezzas,» di il president da la Confederaziun. Pertge nagin pajais saja pli cumpetitiv ed innovativ che la Svizra.

Pensums da chasa communabels

Per che quai restia dentant uschia, stoppian er tscherts pensums da chasa vegnir fatgs urgentamain. Schneider-Ammann numna trais impurtants pensums: Sco emprim, segirar la via bilaterala e cunquai era la suveranitad da la Svizra.

Lura rinforzar las interpresas sco garants per plazzas da lavur e cunquai era per la segirtad sociala e la bainstanza. Ses moto era e resta perquai sco minister d’economia: «Communablamain per jobs e per noss pajais.»

E sco terz pensum dovria quai curaschi da far refurmas ch’i duvrass gia daditg. El ha encuraschà en ses pled da Bumaun las abitantas ed abitants dal pajais «da puspè patratgar pli curaschus or da la confidenza, empè or da la disfidanza.» I valia da pussibilitar dapli e da scumandar pli pauc.

Duai umanitar

En pli ha Schneider-Ammann ditg ch’i saja il duair umanitar, da mitigiar la miseria da fugitivs periclitads. «Tgi che chatta protecziuns tar nus, sto dentant era respectar nossas reglas», uschia il minister d'economia e president da la Confederaziun, Johann Schneider-Ammann.

Artitgels legids il pli savens

Scrollar a sanestra Scrollar a dretga