Siglir tar il cuntegn

Header

audio
Sustegn en vista ad ina stagiun d’enviern che na vegn betg ad esser simpla
Or da Actualitad dals 23.11.2020.
laschar ir. Durada: 03:50 minutas.
cuntegn

Svizra Sa preparar per ina stagiun d’enviern extraordinaria

Svizra Turissem vul carmalar cun la campagna «My first time» novizs da naiv en las muntognas.

Las cifras che Svizra Turissem ha preschentà n’èn betg bunas. 19 pertschient pli paucas cudeschaziuns per vacanzas da Nadal en las muntognas. E perfin 28 pertschient pli paucas cudeschaziuns per las vacanzas da sport. Il coronavirus fraina il plaschair da passentar intgins bels dis en ils culms amez la naiv.

Per l’entir enviern vegn quintà cun in tschintgavel pli paucas pernottaziuns ch'anc avant dus onns. Quai è stà l’ultim enviern regular, senza influenza dal coronavirus. Malgrà quai na vesa Martin Nydegger, il directur da Svizra Turissem, betg nair per la stagiun d’enviern.

Quest è in onn extraordinari. Nus na tschertgain betg da cuntanscher ina occupaziun da 100 pertschient che nus avain uschiglio en ils onns normals. Nus vulain ina stagiun d’enviern solida e per cuntanscher quai èn ils sviaders mess.
Autur: Martin Nydeggerdirectur Svizra Turissem

La branscha saja preparada, haja fatg ses pensums. Uschia per exempel cun definir concepts da protecziun che valan en l'entira Svizra. Mascrinas avant e sin ils runals, pli paucs passagiers en las telecabinas e restricziuns en las ustarias en il territori da skis.

«I dat era novas offertas. Per exempel ustarias Ski-Trought nua ch’ins po ir per il mangiar direct cun ils skis. E bleras destinaziuns èn s’engaschadas per activitads che capitan sper la pista. Turas cun gianellas, vias da scarsolar ni era passlung.»

Naginas restricziuns novas

In factur ch’è mo grev da calcular èn las cifras d'infecziuns. Qua vala la Svizra anc adina sco ina da quests pajais cun las pli bleras infecziuns. Quai che po starmentar blers giasts da l’exteriur da vegnir e giudair la naiv en Svizra. Na fissi lura betg stà meglier da far in lockdown strict sco l'Austria per uschia garantir in bun Nadal?

Na, manegia Martin Nydegger. Era l’Austria n’haja uschia nagina garanzia. I vegnia a sa mussar tge via ch’è stada la dretga.

Placat da la campagna "My first time" da Svizra turissem.
Legenda: Per l'emprima giada far in curs dad ir cun skis? - La campagna da Svizra turissem cun il num "My first time" duai encuraschar da far insatge nov quest enviern. Svizra turissem

Regiuns cun osps indigens pon era profitar l'enviern

Il Grischun na vul dentant betg spetgar sin ils osps esters e focussescha cleramain sin osps indigens che duain emplenir ils letgs ellas destinaziuns da vacanzas. Enstagl dad ir el sid, a la mar e giudair il chaud vegnir ellas muntognas e giudair la naiv, uschia il motto.

Sustegn survegnan ils turistichers grischuns era da Svizra turissem e sia campagna «My first time», mia emprima giada. Ils Svizzers veglian era quest enviern giudair il sulegl, vegnir ord l'atgna chasa e passentar in bun temp, è Martin Nydegger persvas. E natiralmain era in pau emblidar tut quai da corona. Per quels hajan els stgaffì aventuras spezialas.

«Forsa fan els ina giada in curs da prova da snowboard ni skis, ni ch’els fan in viadi en charrotscha ni ch’els fan passlung ni ina spassegiada cun gianellas. Per nus ch’enconuschain la naiv nagut nov mo per bleras persunas vegn quai ad esser ina emprima giada.»

Naiv e cunfins averts

Anc in mais enfin Nadal. Tge giavisch ha il directur da Svizra turissem per sia branscha? Martin Nydegger mira sur ils cunfins ora.

Mes giavisch da Nadal è che nus pudain beneventar osps da l’exteriur per la festa da Nadal e che las restricziuns da quarantina vegnan schluccadas.
Autur: Martin Nydeggerdirectur Svizra Turissem

E betg d’emblidar la naiv natiralmain. E sche tut quai va lura en vigur possian ils turistichers svizzers guardar cun speranza sin la stagiun d’enviern.

Artitgels legids il pli savens

Scrollar a sanestra Scrollar a dretga