Siglir tar il cuntegn

Svizra Salvar la vita cun in molecul sintetic

Perscrutaders da l’Inselspital a Berna han scuvrì ina pussaivladad per evitar ch’uffants naschan memia baud. A questa conclusiun vegnan ils Bernais ensemen cun collegas da Roma e Miami, rapporta l’agentura da novitads svizra sda.

Maun dad in uffantin.
Legenda: Ils perscrutaders speran da pudair reducir cun lur scuverta inflammaziuns privlusas per poppas e pops. Keystone

Infecziuns durant la gravidanza pon avair consequenzas dramaticas: Ellas pon esser la raschun per naschientschas prematuras u perfin la mort da l’uffant. Uss han ils perscrutaders scuvrì, ch’in molecul da gravidanza sintetic pudess reducir questas inflammaziuns.

Copiar il molecul natiral da maniera sintetica

Normalmain producescha l’embrio durant la gravidanza il molecul PIF (PreImplantation Factor). PIF reducescha inflammaziuns e naschientschas dad uffants morts e rinforza il fetus durant ch’el crescha. Ils perscrutaders han uss scuvrì, ch’in molecul producì da maniera sintetica po avair la medema vigur ch’il molecul natiral.

Conferma per vigur anti-inflammatorica en experiments cun mieurs

A quella conclusiun sajan els vegnids tras experiments cun mieurs, scrivan ils perscrutaders en lur rapport en la gasetta scientifica «PLoS One». Il team examinescha ussa sch'igl pussaivel da far in studi clinic cun dunnas en speranza.

RR novitads 12:00