Siglir tar il cuntegn

Svizra Sanadad en Svizra custa adina dapli

Ils custs per la sanadad en Svizra creschan ad in crescher. L’onn passà hai dà in augment da 2,7% - tenor il post per la perscrutaziun da conjunctura KOF in augment moderà. Quest e l'auter onn quinta il KOF ch’ils custs creschan pli fitg.

Ina lavurera da la Spitex che tgira ina persuna attempada a chasa.
Legenda: 266’264 persunas, u 6,9% dals emploiads en Svizra: Quai è il dumber total (plazzas cumplainas) da persunas che lavuan en il sectur da sanadad. Keystone

Las expensas per la sanadad s'augmentan quest e l'auter onn pli fitg ch'il 2015. Quai spetga il post per la perscrutaziun da la conjunctura KOF da l'ETH Turitg.

Per quest onn quinta il KOF cun in augment da 3,6%, per l'auter onn cun in augment da 3,9%. Tenor il KOF saja in dals motivs ch'i dat adina dapli persunas attempadas e veglias.

Custs da medicaments pli bass

L’augment dals custs da 2,7% il 2015 saja stà moderà, scriva il KOF. La raschun per l’augment pli pitschen sajan stads pli bass custs per medicaments e la flaivla conjunctura. Uschia èn vegnids spargnads radund 720 milliuns francs.

Augment tar fisioterapia e Spitex

Il 2017 vegn l’economia probablamain puspè ad esser pli dinamica, las pajas vegnan a crescher. Perquai quinta il KOF er cun pli auts custs da sanadad, totalmain cun 78,7 milliardas francs.

Las expensas per fisioterapia, tractaments ambulants en ospitals u praticas da medis e per la sparta Spitex vegnan a crescher surproporziunalmain.

RR novitads 11:00