La cumissiun da sanadad dal Cussegl dals chantuns vul che medis e medias ston demussar bunas enconuschientschas da la lingua. Ed ella vul decider sezza davart ils detagls. Quai ha la cumissiun decidì cun 8 cunter 5 vuschs. Il Cussegl naziunal vuleva surlaschar quai al Cussegl federal.
Duvrar il linguatg dal lieu a moda cumpetenta
Las medias ed ils medis duain far in examen per demussar ch'els san discurrer e duvrar il linguatg da lur lieu da lavur a moda cumpetenta. Da principi ston els cuntanscher il segund aut nivel C1. Quels che han fatg la matura en Svizra e quels che han fatg il studi da medischina en il linguatg da lur lieu da lavur na stoppian dentant betg far quest examen.
Ulteriuras midadas
Quella ed ulteriuras midadas ch'il Cussegl dals chantuns ha discutà duain cunzunt franar il stop da medis che vegn adina puspè prolungà. Tranter auter ha la cumissiun da sanadad detg gea a la decisiun dal Cussegl naziunal da far obligatoric il dossier electronic dal pazient per medias e medis. Il project duai oravant tut franar l'immigraziun da medis da l'Uniun europeica.
RR novitads 12:00