Giuvnas politicras e politichers da sanestra a dretga èn sa reunidas oz cun la fundaziun, Pro Juventute, sin la plazza davant la Chasa federala. La finamira: sensibilisar per la sanadad psichica dad uffants e giuvenils ed appellar als chantuns d'agir.
La crisa dal clima, la pandemia, la guerra en l’ost dall’Europa, ina crisa d’energia – tut temas che smanatschan. A quellas crisas èn ils uffants e giuvenils exponids actualmain. E quai na passa betg senza laschar enavos fastitgs.
Dapli uffants e giuvenils cun problems psichics
Ils davos 2 onns sajan las consultaziuns tar Pro Juventute creschidas per radund 1/3. Mintga di s’annunzian en media 7 enfin 8 uffants e giuvenils cun patratgs da suicidi. Tenor la directura da Pro Juventute – Katja Schönenberger èn ils posts da cussegliaziun al cunfin da lur capacitads. I drovi resursas finanzialas supplementaras dal maun public – uschia – Schönenberger envers il radio SRF. Era las representantas e representants da las partidas giuvnas èn qua dal medem maini: i drova rispostas politicas per la pressiun psichica dad uffants e giuvenils ch’è creschida.
