En il center federal d'asil a Berna è in uffant vegnì testà positiv sin la malsogna infectusa da difteria. La mattatscha sa chattia en l'ospital. La famiglia saja en quarantina. Il servetsch medicinal dal chantun Berna haja perquai ordinà in stop d'admetter e transferir asilantas ed asilants sin duas auzadas dal center d'asil en l'anteriur «Zieglerspital», communitgescha il chantun Berna. Ultra da quai vegnan tut las persunas en questas auzadas testadas sin la malsogna e vegnan tractads preventivamain cun antibiotica. La famiglia da la mattatscha malsauna è en quarantina.
Cas da difteria cumuleschan en centers d'asil
Ils cas da difteria s'augmentan dapi intginas emnas. Gia l'entschatta d'avust eran vegnidas malsauns a Berna otg persunas cun difteria. Bun duas emnas pli tard aveva quai era dà in ulteriur cas da difteria en il center federal a Boudry. En l'entira Svizra hajan almain 22 abitantas ed abitans da centers federals d'asil gì la malsogna il mais passà. Duas da las persunas malsaunas han mussà sintoms da la varianta privlusa – la difteria da la gula. Anc betg enconuschent saja, sche tut questas infecziuns hajan in connex, ha confermà l'Uffizi federal per sanadad (BAG) a l'agentura da novitads Keystone-SDA. Per la populaziun na dettia però nagin privel. Tranter auter perquai che la quota da persunas vaccinadas encunter la difteria saja en Svizra fitg auta. L'ultim cas enconuschent en Svizra è stà il 1983.
Difteria en duas variantas – la respiratorica è fitg privlusa
La difteria è ina malsogna infectusa derasada sin l'entir mund – quai surtut en regiuns cun quotas da vaccinaziun bassas, sco per exempel l'Africa, l'Asia e l'America latina. En ils stadis industrials è la difteria tant sco svanida. Ella vegn chaschunada dad in bacterium. Transferida vegn ella per la gronda part sur daguts – da carstgaun a carstgaun. I dat duas variantas da difteria: La difteria respiratorica che attatga las via da respirar, e la varianta cutana ch'attatga la pel. Il bacterium producescha in toxin ferm che donnegescha cun effect cuzzont organs sco il cor, il dir u era ils gnirunchels. Cumbatter la malsogna pon ins cun in cuntratissi ed era cun antibiotica.