Siglir tar il cuntegn

Header

Martin Candinas, Anna Giacometti, Mauro Tuena ed Jon Pult avant la Chasa federala
Legenda: Keystone
cuntegn

Sancziuns cunter Russia «Meglier tard che mai»

En il Parlament federal èn las bleras politicras ed ils blers politichers cuntents ch’il Cussegl federal ha decidì da suandar las sancziuns da l’UE.

I saja stà nairas uras ch'il Cussegl federal decidia da surprender las sancziuns da l'UE cunter la Russia. Da quella opiniun è il cusseglier naziunal da l'Allianza dal center, Martin Candinas. Era el saja stà a l'entschatta fitg precaut da pretender sancziuns.

Dentant dal mument cura ch’i n’era betg pli mo ils dus territoris gia occupads da la Russia mabain dapli eri cler che quai na va betg.
Autur: Martin Candinas Cusseglier naziunal AdC
audio
Sancziuns cunter la Russia: Reacziuns da parlamentaris naziunals
ord Actualitad dals 28.02.2022.
laschar ir. Durada: 2 minutas 34 Secundas.

Ch'il Cussegl federal avessi bain pudì decider pli baud a favur da las sancziuns, da quella opiniun è la cussegliera naziunala liberaldemocratica Anna Giacometti. Ella saja dentant era cuntenta che la chombra gronda haja oz era acceptà cun gronda maioritad la decleraziun da sustegn per l'Ucraina e cunter l'agressiun russa. E quai era anc en preschientscha da l’ambassadur ucranais.

Jau speresch propi che questa guerra chala. Quai è propi trist da vesair.
Autur: Anna Giacometti Cussegliera naziunala PLD

Tut autra la reacziun da Mauro Tuena, il cusseglier naziunal da la partida populara da la Svizra da Turitg. Tenor el saja la decisiun dal Cussegl federal in pregiudizi privlus per il futur e fetschia donn a la neutralitad da la Svizra. Lezza haja era offert da manar tras discurs da negoziaziuns e da pasch.

Mo sch’ins decida cunter ina da quellas partidas sancziuns lura daventan talas negoziaziuns difficilas perquai ch’ins n’è betg pli neutrals.
Autur: Mauro Tuena Cusseglier naziunal PPS

Insumma betg da quella opiniun è il cusseglier naziunal socialdemocrat Jon Pult. Era auters pajais neutrals sco l’Austria, la Finlanda u la Svezia hajan surpiglià las sancziuns. Neutralitad na muntia betg ch’ins saja neutrals en confrunt cun ina violaziun dal dretg internaziunal.

Neutralitad munta ch’ins na sa participescha betg activamain a guerras. Surpigliar responsabladad e sancziuns cunter in reschim che ha fatg in’attatga illegala è in imperativ moral e politicamain necessari.
Autur: Jon Pult Cusseglier naziunal PS

El tema plitost ch’il Cussegl federal haja fatg quai pass in zic tard, uschia ch'oligarchs russ hajan gì la chaschun da svidar lur contos svizzers ed uschia guntgir las sancziuns.

RTR actualitad 17:00

Artitgels legids il pli savens

Scrollar a sanestra Scrollar a dretga