Siglir tar il cuntegn

Header

cuntegn

Santésuisse Grond potenzial da spargn tar ils ospitals

Ils ospitals svizzers hajan anc in grond potenzial da spargn. Quai ha il president dal cussegl d'administraziun da Santésuisse, Heinz Brand ditg en il Blick.

Purtret da Heinz Brand.
Legenda: Keystone

La crisa da corona haja mussà che la purschida possia anc vegnir optimada. Tar la medischina intensiva saja quella memia pitschna – en autras partiziuns percunter memia gronda.

Pli flexibel

Latiers stoppia la sparta d'ospitals en general vegnir pli dinamica ed esser abla da s'adattar pli svelt a midadas.

Oz vai per quai che schebain persunal sco era apparats possian vegnir utilisads a moda pli flexibla.
Autur: Heinz BrandPresident cussegl d'administraziun Santésuisse

Plinavant ha Brand dentant er declerà che las premias na duain betg crescher quest onn pervi da corona, quai possia el empermetter. Las cassas da malsauns hajan fatg ils ultims onns reservas, da quellas possian ins uss far diever per custs supplementars. Er sin ina segunda unda sajan las cassas preparadas. Ma las premias na possian uschè u uschia betg pli crescher gists sco ellas veglian, ha Brand accentuà envers il Blick.

Strusch udida per ils assicurads

Quitads fa il president da Santésuisse dentant davart la moda, co ch'ils assicurads èn represchentads en il parlament.

Ils furniturs da prestaziuns, sco medis, ospitals u la Spitex èn represchentads bler meglier en il parlament che las cassas da malsauns.
Autur: Heinz BrandPresident dal cussegl d'administraziun da Santésuisse

Pli pauc che 10 parlamentaris hajan in connex tar cassas da malsauns. La represchentaziun da quels che pajan premias saja sut in ferm squitsch, di Brand. Els sa chattian fermamain en la defensiva.

Santésuisse emprovia da franar il svilup enorm da purschidas. Vitiers tutgia il sistem da referenza per generica, pia per medicaments che n'han nagina protecziun da patent pli. Be qua giaja per in potenzial da spargn da 400 milliuns francs. E la cumpart da generica al martgà svizzer saja fin uss be tar 20%. En l'exteriur saja quel per part tar passa 80%, quai che mussia in ulteriur potenzial da spargn.

RTR novitads 12:00

Artitgels legids il pli savens

Ir a sanester Ir a dretg