In pilot da l’Armada svizra è vegnì tschorventà l'emna passada durant pliras minutas dad in punctader da laser. Capità è l’incident la mesemna durant in sgol d’exercizi en la regiun da Sargans. Sco la Polizia chantunala da Son Gagl communitgescha, èn ils dus pilots sco er ils passagiers a bord restads senza blessuras. Il Super Puma ha pudì vegnir platgà a moda segira.
La polizia ha curt suenter l'attatga pudì eruir in um da 35 onns ch'ha admess d'avair tschorventà il pilot. L'um vegn denunzià tar la procura publica dal chantun Son Gagl.
Agir privlus e chastiabel
La polizia avertescha en quest connex da l'utilisaziun da punctuaders da laser. Adina puspè dettia attatgas cun tals punctuaders sin pilots u manischunzs dal traffic public. Quest agir saja chastiabel e fermamain privlus. Sch'in radi da laser frunta sin in egl, po quel chaschunar blessuras tar il pertutgà e manar ad accidents.