Saut contemporan e ballet – quai en ils dus stils da saut che Silvia Probst fa il pli gugent. Minimum 3 uras e mez trenescha ella – e quai mintga di. Ella è sautunza libra, pia il mument betg engaschada en in ensemble da saut. Perquai è ella sezza responsabla da restar fit e tegnair il nivel pretendì.
Jau less vegnir meglra e meglra pertge ils teaters pretendan in aut nivel.
Avant da curt è la dunna da 29 onns ch'è oriunda da Mustér ed abita a Turitg vegnida engaschada per il toc «Die Walküre» dal Teater Berna. Esser tant sco pussibel sin tribuna da teater, gliez è era la finamira da Silvia Probst.
Gia be d'esser là fa mai uschè cuntenta. E betg mo da sautar, mabain era tut quai che marscha enturn tribuna.
Cumenzà studi da saut, ma betg finì
Ballet sauta ella gia dapi ch'ella ha quatter onns. Suenter ch'ella ha fatg la matura è ella sa decidida d'entschaiver in studi da saut a Londra. Quai haja plaschì fitg bain ad ella. Ella haja gì la pussaivladad d’empruvar differents stils da saut e passentar bler temp cun sia activitad preferida.
Ma pervia da la malsegirtad sch'i tanschia da far carriera, sch'ella saja buna avunda, ha ella suenter in onn prendì la decisiun da turnar en Svizra ed entschaiver il studi da scienzas da sanadad e tecnologia a la Scola politecnica federala a Turitg.
Ussa finiss jau quest studi a Londra ma da lez temp er'jau anc pli giuvna e malsegira.
Leda d'avair fatg il studi
Tuttina è la Sursilvana leda dad avair terminà il studi a Turitg. Per l'ina perquai ch'ella ha tras quel emprendì bler davart il corp e per l'autra perquai ch'ella ha lura meglras schanzas da chattar ina plazza sch'ella na po in di betg pli sautar. Ma per il mument na datti nagin plan B per Silvia Probst.
Grev da s'etablir
Bunamain mintga di s'annunzia ella per projects e plazzas da saut en Svizra, dentant era en l'exteriur. Il process da casting saja dentant grevs e giaja per part ditg perquai ch'i dettia pliras rundas e bleras plazzas vegnian era surdadas a persunas ch'ins enconuschia gia.
Ma tut quai na retegna betg Silvia Probst da far quai ch'ella fa il pli gugent. Era ils trenaments quotidians s'audan vitiers.
Jau ma mov simplamain gugent. Sche jau na pudess betg far quai, mancass insatge.
