Siglir tar il cuntegn
Inhalt

Svizra Savognin: Il martgà da segundas abitaziuns stagnescha

Divers hotels a Savognin pateschan. I mancan ils giasts ed ils raps. Tge far cun ils hotels per ch'ì na giajan betg en muschna? In’opziun fiss da far segundas abitaziuns. Ma sco ì para na rendan era quellas betg propi.

Savognin.
Legenda: Il martgà per segundas abitaziuns para en tscherts lieus d'esser sursaturà. Keystone

Il cusseglier dals chantuns Beat Rieder (PCD/VS) vul schluccar ina lescha da segundas abitaziuns. Dapi il 2016 na pon ins betg midar dapli che 50% dad in hotel en segundas abitaziuns. Tenor Rieder è quai ina lescha senza mauns e pes. El vul midar la lescha uschè che hotels pon vegnir midads enturn 100% en segundas abitaziuns.

Portrait.
Legenda: Keystone
Quai na fa nagin senn da fabritgar mo 50% dad in hotel che na renda betg en abitaziuns secundaras. Co duai in mez hotel render cura ch'in hotel entir na renda betg?! Quai è absurd...
Autur: Beat RiederCusseglier dals chantuns Vallais PCD

Tge far cun in hotel che na renda betg pli?

In hotel, ch'è en la situaziun da ponderar tge far, è il hotel Piz Mitgel a Savognin. L’hotel na renda betg pli e cun quai mancan ils raps. Las opziuns, ch'il hotelier Sepp Waldegg vesa, èn per ina da dar si il hotel. Quai è dentant l’opziun, che Sepp Waldegg na vul betg prender – mo sco ultima soluziun.

La segunda opziun, che Sepp Waldegg ha ponderà, è da midar l'hotel en segundas abitaziuns. Dentant sa el dad auters hoteliers da Savognin, che quellas na vegnan betg pli cumpradas. Il martgà saja dat ensemen.

Uss è el vi da studegiar da far in project per seniors cun ses hotel.

Da 24 segundas abitaziuns vendì 1

In auter hotelier da Savognin, che na vul betg vegnir numnà, ha fabritgà segundas abitaziuns or da ses hotel. 24 segundas abitaziuns ha el uss, dentant cumprada e fin uss mo ina. El manegia, ch'ì dettia il mument ina tscherta tema tar ils interessents:

I sa mussa ina malsegirezza tar ils interessents da segundas abitaziuns.
hotelier da Savognin

La lescha nova da las segundas abitaziuns haja purtà divers novs reglaments ed ils interessents hajan tema da far insatge cunter la lescha cun cumprar in'abitaziun. In'autra tema, ch'il hotelier vesa, saja la midada da clima. El manegia che blers hajan il sentiment, ch'ì na detta betg pli ditg naiv a Savognin ed uschè na vulan els betg cumprar in'abitaziun da vacanzas.

RR actualitad 08:00