L'aria per l'aviatica militara svizra vegn adina pli satiglia. Raschun èn ils aviuns da cumbat F/A-18. L'ultim temp hai adina puspè da stgarps che fan quitads vi dals aviuns. Tocs da reserva na van betg da montar perquai ch'i na van betg e mainan uschia tar pli lungs temps en garascha per ils aviuns. Sco la Sonntagszeitung scriva han ils responsabels avant 30 onns tralaschà da far tests impurtants cun ils aviuns. Perquai vegnan els pli svelt vegls che quai ch'ins ha spetgà là.
Topografia svizra è pli pretensiusa
Ils onns 90 han ins realisà che la topografia muntagnarda da la Svizra strapatscha pli fitg l’aviun che quai ch'il producent aveva previs. Auter ch'en Svizra n'è il cumbat en l'aria betg in punct central per ils aviuns tar ils Americans. Las forzas militaras en ils Stadis Unids dovran pli savens l'aviun per sgols lungs giu da portaviuns en la mar. Cun excepziun dal start ed il sa tschentar vegn il material uschia strapatschà pli pauc. Perquai èn tschertas parts da l’aviun per l'armada svizra era construidas cun titan e betg cun aluminium. Las vibraziuns e lur consequenzas sin il material sajan però vegnidas sutvalitadas, scriva la «Sonntagszeitung».
Consequenzas n'eran betg vegnidas testadas
Perquai hajan ils jets da cumbat F/A 18 da la Svizra bler pli baud che spetgà segns d’isada. Tranter auter pervi da vibraziuns – tge consequenzas che quellas pon avair n'avevan ins betg testà. Spezialmain pertutgà èn las parts davos da l'aviun e las parts da las alas il pli orasum.
Aviuns ston far 1'000 uras dapli che previs
Betg per l'emprima giada èn ils aviuns a disposiziun be a moda reducida. Raschun èn lavurs da mantegniment vi da las F/A-18. Quellas lavurs duain anc ina giada prolungar la vita da las F/A-18. Suenter il Na dal pievel svizzer al Gripen, na ston ils aviuns betg be sgular 5'000 uras mabain 6'000. Uss han ils mecanists chattà problems nunspetgads. Ils aviuns n'èn betg construids tuts tuttina, ha declerà il schef da l'aviatica svizra Bernhard Müller a la Sonntagszeitung. Per exempel na giajan tscherts tocs da reserva betg sin tscherts aviuns, perquai che las rusnas per las struvas n'èn betg tar tuts en il medem lieu.
Restricziuns fin il 2024
Perquai ch'ils aviuns èn daventads in misteri per ils mecanists, n'èsi betg pussibel da far ina prognosa co i vegn a star en il futur enturn la disponibilitad dals aviuns. Tenor l'Uffizi federal da l'armament èsi da quintar fin il 2024 cun restricziuns.
RR novitads 07:00