Siglir tar il cuntegn
Inhalt

Svizra SBB cuntenta cun tunnel da basa dal Gottard

Suenter 18 mais tiran las Viafiers federalas ina bilantscha positiva dal tunnel da basa dal Gottard. L'implant funcziunia bain e segir dapi ch'el saja mess en funcziun. Plinavant saja enfin uss tut ì tenor las spetgas.

Purtret d'in tren da l'SBB che charrescha en il tunnel dal Gottard.
Legenda: Las Viafiers federalas èn fin uss cuntentas cun il tunnel da basa dal Gottard. Keystone

Malgrà ch'il tunnel da basa dal Gottard è nov stoppian gia uss vegnir fatgas revisiuns, han las Viafiers federalas communitgà. L'onn passà han questas lavurs custà radund 30 milliuns francs. Tar las pli impurtantas lavurs han tutgà quellas da mantegniment vid implants da telecommunicaziun ed implants electronics, sco era il remplazzament da material isà sco binaris.

Suenter 18 onns temp da bajegiar saja ina part dals implants gia pulit vegls, ha Daniel Salzmann il manader dal project «Axa nord sid Gottard» ditg a l'Agentura da novitads svizra. Quests implants dovrian lavurs intensivas da mantegniment.

Distanza tranter binaris vegn schlargiada

Per ch'ils trens possian charrar cun enfin 250 kilometers l'ura tras il tunnel stoppia la distanza tranter ils binaris vegnir schlargiada per radund dus millimeters. Quai vegnia realisà il 2019 durant las lavurs normalas da mantegniment, senza che la clientella sentia insatge da quai.

En tut èn tenor la SBB gia radund 70'000 trens charrads tras il tunnel. In di normal da lavur sajan quai radund 170 trens, da quai 120 trens da vitgira. Il record d'enfin uss giaschia tar 1'005 trens en in'emna.

RR novitads 09:00