Retards e viadis pli lungs han ils viagiaturs da la SBB stuì acceptar questa stad. L'urari da las Viafiers federalas è surtut en la Svizra Franzosa, en la Svizra dal Nordvest ed en ils conturns da Son Gagl stà reducì. Per la SBB èsi durant quest temp stà pussaivel da far lavurs da mantegniment sin passa 30 plazzals.
I haja sa cumprovà da far las lavurs durant la stad, cura che pli paucas persunas sajan stadas da viadi, ha communitga la SBB il glindesdi. Uschia hajan ins pudì construir pli bunmartgà ed er pli effizient. Tenor indicaziuns da la SBB sajan ils custs stads en tut 22% u 20 milliuns pli bass. En il medem mument haja la segirezza dals lavurants pudì vegnir augmentada.
Las lavurs han tuttas pudì vegnir terminadas a temp e dapi quest glindesdi vala puspè l'urari regular. Sche la SBB maina er l'onn che vegn in urari da stad, n'è anc betg enconuschent.
RR novitads 06:00