A la glisch era tut vegnì en connex cun ils Paradise Papers, ina rimnada da passa 13 milliuns documents d'ina advocatura sin las Bahamas spezialisada sin constructs dad offshore.
Cura che Monika Ribar è vegnida elegida en il cussegl d'administraziun da la SBB, era ella numnadamain er commembra dal cussegl d'administraziun da la societad d'offshore Capoinvest Limited. Quella finanziescha la construcziun d'in port en Angola e stat en connex cun in Svizzer ch'è vegnì sentenzià pervi da gestiun malfidaivla. Tar sia candidatura n'aveva Ribar betg declerà questa commembranza difficila, e dà giu quest mandat avev'ella pir curt avant che cumenzar l'uffizi da la SBB.
En futur dapli transparenza
La cumissiun da gestiun dal Cussegl dals chantuns crititgescha en ses rapport, ch'il cussegl d'administraziun da las Viafiers federalas n'haja betg controllà avunda ils lioms d'interess da ses commembers. Crititgà vegn però er il Cussegl federal: Sco possessur da la SBB avess lez stuì pretender dapli transparenza.
Per cuntanscher quai, duain uss tut las interpresas da manaivel da la Confederaziun stuair annunziar immediat tut ils mandats da ses cussegliers d'administraziun.
RR novitads 12:00
