Las cifras na laschan avert naginas dumondas. In'egliada sin la pagina online «pünktlichkeit.ch» mussa ch'in da quatter trens sin il traject Turitg-Berna ha gì retard, ils ultims set dis. En la direcziun cuntraria èsi stà mintga 5avel tren.
Nus pigliain fitg serius quest tema.
Sch'ins mesira cun las atgnas mesiras da la Viafier federala, nua che in tren vala sco nunpunctual sch'el ha passa trais minutas retard, lura ha prest mintga segund tren tranter Turitg e Berna ils ultims dis gì retard.
Numerus disturbis durant ils ultims dis ed emnas, uschia problems cun ils indrizs da regulaziun u locomotivas defectas hajan manà a questa schletta bilantscha. Dapi passa trais mais è la punctualitad dals trens tranter Turitg e Berna stada sut la media. Quai è er da constatar tar ils trajects tranter Basilea e Turitg e Losanna e Friburg.
Nagina schliaziun svelta
La SBB para perplexa tge far cunter ils retards. Las raschuns sajan differentas e n'hajan nagin connex.
Da formular ussa qua ina schliaziun è il mument fitg grev.
Tenor las atgnas finamiras da la SBB ston 91% da tut ils passagiers arrivar punctualmain. Durant l'emprima mesadad da l'onn è la finamira gist anc vegnida cuntanschida. Per la segunda mesadad da l'onn vegni dentant stretg, prognostitgescha il pledader da la SBB Christian Ginsig. Il mender vegnia anc pir.
Tenor las experientschas datti durant ils ultims trais mais da l'onn, october fin december, ils pli blers retards. Raschuns n'èn dentant nagins disturbis mabain l'aura.
RR novitads 09:00