Il schef da las Viafiers federalas, Vincent Ducrot, ha fatg bilantscha suenter ses emprims 100 dis al timun da la SBB. Pervi dal coronavirus saja la situaziun finanziala «seriusa», ha Ducrot ditg tenor ina communicaziun.
Finanzas magras
La SBB stoppia quintar cun perditas da plirs tschients milliuns francs. Grazia als daners da la Confederaziun saja la liquiditad segirada il mument. Ussa stoppian ins far ina planisaziun per stabilisar ils debits a media vista. La SBB stoppia purtar sezza la perdita d'entradas en il traffic a gronda distanza ed il sectur d'immobiglias, uschia Ducrot vinavant.
Passagiers malcuntents
Plinavant sajan blers viagiaturs malcuntents e quai cun raschun, uschia Ducrot. Il manaschi da tren na saja il mument betg fidaivel e robust avunda e vegnia als cunfins. Uschia dettia memia paucs trens da substituziun ed i vegnia investì memia pauc en il mantegniment da la flotta.
La finala manchian a la SBB memia blers collavuraturs u collavuraturas. Largias dettia cunzunt tar il persunal en las locomotivas. Ed er tar ils mastergnants, inschigners ed informatichers manchia persunal.
