Siglir tar il cuntegn
Inhalt

Svizra Sch'i dat in process, lura demissiunescha Maudet

Il cusseglier guvernativ da Genevra Pierre Maudet (PLD) ha annunzià da demissiunar, sch'i avess da dar in process encunter el. El ed il president da la partida chantunala sajan sa cunvegnids a quai, pertutgant il svilup da las discussiuns cuntraversas davart ses viadi ad Abu Dhabi.

pierre maudet
Legenda: Il cusseglier guvernativ da Genevra, Pierre Maudet, è sut squitsch. Keystone

Il cusseglier guvernativ da Genevra Pierre Maudet (PLD) sa retira sch’i vegni instradà envers el in process giuridic. Encunter Maudet vegn investigà pervia d’in viadi ad Abu Dhabi. Il president da la PLD Genevra Alexandre de Senarclens ha confermà rapports da la gasetta «Le Matin Dimanche». Ins saja d'accord ch’in lung process na giaja betg a prà cun sias funcziun. Maudet sez cundividia quest'opiniun, ha ditg de Senarclens.

L’anteriur candidat per il Cussegl federal ha pervia da las renfatschas gia dà giu plirs dossiers sco era il post da presidi en la regenza.

Viadi dispitaivel

I sa tracta d'in viadi da Pierre Maudet en ils Emirats Arabs Unids dal 2015, ensemen cun sia famiglia ed il schef da stab Patrick Baud-Lavigne e l'interprendider Antoine Daher. Questa dimora na saja betg vegnida pajada d'in ami u ami d'in ami, aveva Maudet pretendì l'entschatta. Il quint aveva pajà il prinzi ereditari da l'emirat, scheich Mohamed Bin Zayed bin Al-Nahyan.

RR novitads 17:00