Siglir tar il cuntegn
Inhalt

Svizra Sche l'ieli da stgaudar vegn pli char n'è betg Trump la culpa

Ni Donald Trump ni ils schaics da l'Arabia Saudita èn la culpa sche l'ieli da stgaudar vegn pli char. Il livel dal Rain influenzescha dentant ils pretschs dal carburant.

duas grondas pumpas tiran l'ieli (petroli) ord il terren
Legenda: Ieli è custaivel. Fertant che l'ieli da stgaudar vegn transportà sin ils binaris en Svizra è il carburant dependent da l'aua dal Rain. Lez vegn numnadamain furnì cun ils bastiments da Rotterdam a Basilea. Keystone

Il pretsch d'ieli da stgaudar s'augmenta mintg'onn l'atun. Tenor Roland Bilang, il mainagestiun da l'uniun d'ieli Svizra, saja l'augment dal pretsch per l'ieli da stgaudar betg pli aut ch'ils ultims onns l'atun. Il pretsch dependia ferm da la purschida e la dumonda. E la dumonda creschia mintg'onn cu i vegnia pli fraid. Era ils auts custs da transport sin il Rain na chaschunian betg pli auts pretschs da l'ieli da stgaudar, cunquai che quest ieli vegnia transportà via ils binaris.

Sch'ì vegn fraid, lura duess ins gia avair emplenì il tanc d'ieli da stgaudar.
Autur: Roland Bilangmainagestiun uniun d'ieli Svizra

Il livel da l'aua influenzescha il pretsch dal carburant

En congual cun la stad passada èn ils pretschs da transport per il carburant il mument sis giadas pli chars. Ed ina fin da l'augment dal pretsch na vesa Roland Bilang betg. Ils bastiments na possian simplamain betg furnir avunda carburant. Perquai ha la Confederaziun dà liber uss 30'000 meters cubic diesel da lur reservas obligatoricas. Quai gidia da surmuntar las stretgas da furniziun, haja dentant nagina influenza sin il pretsch al tancadi.

Las reservas obligatoricas da diesel

La confederaziun è obligada d'avair reservas da diesel che tanschan per almain 4 mais e mez. Ils 22-10-2018 ha la confederaziun dà liber 30'000 meters cubic diesel ord questas reservas. Quai correspunda ca. ad 1% da l'entir deposit. Uschè prest che la situaziun da provediment è sa calmada vegn questa cumpart puspè emplenida.

RR actualitad 12:00