Svizra - Schef da la Raiffeisen, Patrik Gisel, sa retira - Novitads

Curt e concis:

Patrik Gisel sa retira sco schef da la banca Raiffeisen. El vul proteger la reputaziun da la banca e finir la debatta enturn sia persuna.
La Raiffeisen tschertga in successur per il post dal schef da banca.
La banca sincerescha ch'ella n'haja naginas indicaziuns che Gisel haja fatg sbagls. Sia integritad na vegnia betg messa en dumonda.

Legende: Audio Mezdi: Patrik Gisel dat giu ses post – Nova entschatta per la Raiffesien? abspielen. Laufzeit 3:22 Minuten.

3:22 min, Actualitad dals 18.07.2018.

Gisel dat giu ses post la fin da quest onn, quai per ch'i dettia ina midada ordinada. Il cussegl d'administraziun da la Raiffeisen Svizra haja immediat cumenzà a tschertgar in successur.

Pervi da l'affera enturn l'anteriur schef da la Raiffeisen, Pierin Vincenz, era Gisel vegnì crititgà fermamain en la publicitad. La procura publica suppona che Vincenz haja administrà a moda malfidaivla sco schef da la Raiffeisen e sco president dal cussegl d'administraziun da la firma da cartas da credit Aduno. Durant quest temp è Gisel stà substitut da Pierin Vincenz. Vincenz sez refusa tut las renfatschas. Durant 15 emnas è el stà en arrest d'inquisiziun. I vala la presumziun d'innocenza.

Finma investighescha transacziuns dad Aduno e Raiffeisen, nua che Pierin Vincenz gioga ina rolla (tar Aduno sco president dal Cussegl d'administraziun, tar Raiffeisen sco CEO). Da sclerir: Sch'i ha dà in conflict d'interess ubain schizunt donns, cura che Raiffeisen ha cumprà Aduno.
December 2017: Finma sistescha la procedura cunter Pierin Vincenz, suenter che lez è sa retratg da tut las funcziuns da manar tar la Helvetia.
December 2017: Aduno e Raiffeisen fan denunzia penala cunter Pierin Vincenz ed in'ulteriur commember dal cussegl d'administraziun.
25-1-2018: Vincenz desista dal presidi en il Cussegl d'administraziun da la Repower.
27-2-2018: La polizia interroghescha Pierin Vincenz e fa perquisiziuns en pliras chasas. La procedura marscha cunter Vincenz e quatter ulteriuras persunas.
3-3-2018: Pierin Vincenz vegn en arrest d'inquisiziun.
16-5-2018: Dretgira prolunghescha arrest d'inquisiziun.
12-6-2018: Procura publica lascha liber Pierin Vincenz cun cundiziuns. Las inquisiziuns cuntinueschan.
18-7-2018: Schef da la Raiffeisen, Patrik Gisel, sa retira per la fin dal 2018. Cun quest pass vul el finir la debatta publica enturn sia persuna e proteger la reputaziun da la banca.

Tschertgà successur

Vincenz è stà 17 onns a la testa da la Raiffeisen ed ha furmà a moda marcanta la terz gronda gruppa da bancas da la Svizra. Ses successur, Patrik Gisel, ha manà la banca dapi il 2015 e banduna la banca la fin dal 2018. Il cussegl d'administraziun ha instradà ils pass necessaris per tschertgar in successur.

La tschertga na pertutga betg be il post sco schef dal concern. L'entschatta mars ha il president dal cussegl d'administraziun Johannes Rüegg-Stürm demissiunà – er pervi da «l'affera Vincenz». Dapi lura vegn il cussegl d'administraziun manà dal vicepresident, Pascal Gantenbein.

Naginas indicaziuns per sbagls tar Gisel

L'integritad da Patrik Gisel è per la Raiffeisen dentant betg messa en dumonda. La Raiffeisen scriva ch'ella haja naginas indicaziuns che Gisel haja fatg sbagls. Ils resultats da la procedura serrada da la Surveglianza federala dals martgads da finanzas (FINMA) n'haja purtà nagut a la glisch. Tuttina guardia quai era ora tar las investigaziuns internas da la Raiffeisen.

RR novitads 07:30