Siglir tar il cuntegn

Header

cuntegn

Schleta racolta 2021 La Svizra n'ha betg avunda tartuffels

La racolta da tartuffels en Svizra è stada mala l'onn passà. Raschun èn las malauras che han fatg empaglia bler. Perquai na po la dumonda da tartuffels betg vegnir cuverta quest onn. La Confederaziun auza perquai temporarmain la limita per il contingent d'import.

Tartuffels en paletscha, rösti e macaruns d'alp – la cuschina svizra na pon ins betg imaginar senza els: ils tartuffels. En media mangia mintga Svizra e mintga Svizzer 45 kilos ad onn. Uss manchi dentant gist questa vivonda da basa impurtanta.

L'aura mala da l'onn passà saja responsabla per la schleta racolta. Quai scriva l'Uffizi federal d'agricultura en ina communicaziun. L'inventari en ils deposits saja perquai radund 30 fin 40% pli pitschen ch'en in onn normal.

Imports duain cuvrir dumonda

L'organisaziun da branscha Swisspatat, parta dal fatg ch'ils tartuffels magasinads na tanschan betg fin tar la proxima racolta. La Confederaziun ha perquai auzà temporarmain il contingent per tartuffels importads, quai sin giavisch da Swisspatat.

Uschia auza l'uffizi il contingent da quest onn per mintgamai 20'000 tonnas tartuffels da cuschinar e tartuffels da raffinar, che vegnan duvrads per products sco chips u pommes frites.

Tartuffels mancan regularmain

Gia l'onn passà ha la Confederaziun stuì auzar il contingent per importar tartuffels, tranter mez matg fin mez zercladur ed il fanadur, per mintgamai 5'000 tonnas sco er mez settember fin mez december per 20'000 tonnas.

Tenor indicaziuns da l'Uffizi federal d'agricultura hajan ins er gia ils tschintg onns avant mintgamai stuì importar tartuffels per radund 14'800 tonnas ad onn.

RTR novitads 12:00

Artitgels legids il pli savens

Scrollar a sanestra Scrollar a dretga