La Svizra ha fatg ils ultims onns marcantamain pli pauc progress pertutgant l'egualisaziun d'umens e dunnas ch'auters pajas da l'Europa dal Vest. Sin la glista da rangaziun d'egualitad è la Svizra perquai glischnada da plaz 10 sin 21. Oravant tut la represchentaziun da las dunnas en posiziuns da regenza e da gestiun d'interpresas saja daventada pli flaivla, quai mussa il rapport Gender-Gap dal forum mundial d'economia WEF.
Inegualitad da paja
Inegualitads tranter dunnas ed umens datti en Svizra surtut en il mund da lavur e da la politica. In pass enavos hai dà en l'ecomomia perquai che pli paucas dunnas èn commembras da la direcziun d'interpresas ed era pervi da las pajas. En media gudognan las dunnas en Svizra anc adina sulettamain 83% da quai ch'ils umens gudognan en media.
Perquai che dapli dunnas eran represchentadas en ils parlaments ed en ulteriuras funcziuns politicas era la valitaziun per la Svizra crudada ora meglra ils ultims onns. Quels rangs che la Svizra aveva fatg bun uschia, èn entant puspè ids a perder. Negativ vegn actualmain valità che memia paucas dunnas han ina posiziun guvernativa.
Islanda danovamain a la testa
Puspè sin l'emprim plaz è era quest onn l'Islanda, seguì da la Norvegia, la Finlanda, Ruanda e la Svezia. La distanza tranter l'Islanda e la Norvegia saja dentant vegnida pli gronda quest onn. Ord vista globala mussa il rapport dal WEF che l'egualitad da las dunnas è sa pegiurada cumpareglià cun ils onns avant. Cun il svilup actual quinta il rapport ch'i durass 100 onns per serrar la sfessa d'egualitad. L'onn passà discurrivan ins anc dad 83 onns.
RR novitads 06:00