Siglir tar il cuntegn

Header

Navigaziun

Petra Gössi e Martin Schmid:
Legenda: Petra Gössi e Martin Schmid: Keystone
cuntegn

Svizra Schmid sustegna tut tenor Gössi cun politica da clima

In pau in urizi è rut ora avant in per emnas, tar la Partida liberaldemocratica. Per surpraisa d'ina gronda part da la partida ha la presidenta Petra Gössi annunzià da metter la politica dal clima en il center. Martin Schmid sustegna il nov curs, dentant cun cundiziuns.

Martin Schmid para dad esser in pau tranter sutgas e bancs. Senza infurmar propi la partida, quasi sin atgna iniziativa, ha la presidenta Petra Gössi annunzià en gasetta ch'ella vul metter la politica dal clima pli ferm en il center da la PLD. La communicaziun betg dal tut gartegiada tenor Schmid, però l'intent da discutar pli intensiv davart il clima, beneventa il liberaldemocrat Grischun.

Quai è endretg che nus intensivain las discussiuns da clima entaifer la partida.
Autur: Martin SchmidCusseglier dals chantuns PLD/GR

Tant d'accord sco quai ch'il cusseglier dals chantuns, Martin Schmid è cun il nov curs da la PLD, n'èn betg tut ses collegas da partida. Singuls n'èn insumma betg perina cun la nova politica blau-verda ch'i duai dar. Entant ch'i hajan anc il december cumbattì cunter ina taxa sin bigliets da sgol, stuessan els uss cumbatter per, vegn crititgà entaifer la partida.

Martin Schmid resta dentant calm, el di ch'i na saja uss anc betg da polarisar. I na sajan anc crudadas naginas decisiuns liantas. Però precis quai è er in zic il clinch da Schmid. El sustegna il nov curs da la politica da clima, dentant cun cundiziuns: L'innovaziun duai star en il center e betg mesiras che portan per la populaziun dapli custs.

Retschertga duai sclerir

Tuts spetgan uss co i va vinavant. Datti or da la partida che n'è betg enconuschenta per ses profil ecologic tuttenina ina partida dal clima? Ed oravant tut tge influenza vegn la discussiun ad avair sin la partida en vista a las elecziuns?

Respostas ch'ina retschertga tar ils 120'000 liberaldemocrats duai purtar. L'entschatta matg vul la direcziun da la partida discutar.

RR actualitad 07:00