Siglir tar il cuntegn

Svizra Schneider-Ammann beneventa il president polac

Il president da la confederaziun, Johann Schneider-Ammann ha retschavì il president polac Andrzej Duda per ina visita uffiziala a Berna. Tranter auter han ils dus politichers discutà davart la realisaziun da l'iniziativa d'immigraziun da massa. Quella aveva gia preoccupà l’onn passà la Pologna.

Johann Schneider-Ammann ed il predient polac Andrzej Duda.
Legenda: Johann Schneider-Ammann ed il predient polac Andrzej Duda. Keystone

Ulteriurs temas èn stads l’economia e la politica da daners. Latiers èsi surtut ì per las numerusas famiglias polaccas ch’han prendì si credits en Svizra ed han ussa fadia da pajar enavos quels. Radund 500’000 persunas avevan prendì sin ina ipoteca dal 2007 fin il 2008, perquai ch’ils tschains eran uschè bass. Dapi lura è il franc però vegnì per 80% pli ferm envers la valuta polacca zloty.

Il pli impurtant partenari economic da l'Europa centrala

Ils ultims onns è la Pologna daventada in impurtant partenari da la Svizra. Il volumen da commerzi dals dus pajais munta a 3,8 milliardas francs. Las investiziuns directas da la Svizra en la Pologna muntan a 6 milliardas francs. Cunquai saja la Pologna il pli impurtant partenari economic da l’Europa centrala, scriva l’uffizi federal per fatgs da l’exteriur.

RR novitads 18:00