Il cusseglier federal Johann Schneider-Amman vul medemas cundiziuns per surpigliar firmas en China sco quai che la China ha en Svizra. Il mument pon numnadamain fonds statals da la China surpigliar firmas Svizras, ma betg il cuntrari. Quai ha il cusseglier federal declerà envers la gasetta «Schweiz am Sonntag».
Plinavant vul Schneider-Amman ch'il Cussegl federal possia intervegnir sch'i dettia surpigliadas tar infrastructura critica sco la rait electrica u la telecommunicaziun entras firmas da l'exteriur. Per il minister d'economia na dependia en tals cas betg, sch'i sa tractia da surpigliadas entras firmas da l'USA ubain da la China.
Schneider Amman è il mument sin missiun diplomatica en China. En il center da ses viadi stat però la convenziun dal commerzi liber che la Svizra ha fatg il 2014 cun la China. Il cusseglier federal vul examinar, sch'i dat pussaivladads da schlargiar quella convenziun.
RR novitads 12:00