Johann Schneider-Ammann haja il plan dad annunziar proxim venderdi sia demissiun. Il termin exact pudess avair sa retardar pervi da las discussiuns en il Cussegl federal davart l'Uniun europeica. Schneider-Amman è vegnì elegì il 2010 en il Cussegl federal. El è al timun dal Departament federal d'economia, furmaziun e retschertga.
Er Doris Leuthard
En Chasa federala spetgan ins er che Doris Leuthard annunzia il medem mument sia demissiun. I dettia pli e pli indizis latiers. Gia la stad passada aveva ella annunzià che quella legislatura en il Cussegl federal saja sia davosa. Doris Leuthard è dapi il 2006 cussegliera federala, l'emprim en il Departament federal d'economia. Dapi il 2010 è ella al timun dal Departament federal per ambient, traffic, energia e communicaziun.
RR novitads 18:00