Siglir tar il cuntegn

Svizra Schneider-Ammann tema l'iniziativa per la suveranitad alimentara

Ina politica agrara persistenta, orientada als purs pitschens e senza tecnologia genetica. I saja in’idea che tuna bain, però suenter quella stettia ina pluna detagls che sajan privlus per la Svizra, ha Johann Schneider-Ammann intunà oz cun lantschar oz il cumbat da votaziun cunter l'iniziativa.

Legende: Audio Mezdi: Iniziativa "Suveranitad alimentara" – arguments dal Cussegl federal abspielen. Laufzeit 02:42 Minuten.
02:42 min, Actualitad dals 21.08.2018.

La politica agrara stuess cun l’iniziativa vegnir pensada da nov, di il cusseglier federal. Quai mettess tut sin il chau. Dentant è quai precis quai ch’ils iniziants, il sindicat dals purs Uniterre, vulan: rinforzar ils purs pitschens, cundiziuns da lavur e pretschs pli fairs. Plinavant na duajan ils gronds concerns betg pli avair tanta pussanza e la producziun duai esser pli persistenta.

Quai na po betg esser manegià serius. Pli dirigistic na vai gnanc betg pli.
Autur: Johann Schneider-Ammanncusseglier federal

Però ina tala restructuraziun da l'agricultura na possa esser manegià serius, di Schneider-Ammann. El tema era per l’economia, custs da producziun vegnissan pli auts, consuments stuessan pajar dapli e l’elecziun en butia foss pli pitschna. Oravant tut cuntrafan las pretensiuns da l’iniziativa, tenor il Cusseglier federal, era al dretg internaziunal da commerzi.

Suveran anc da persvader

Però quellas temas dal cusseglier federal na parta la populaziun svizra il mument betg. L’emprima retschertga da l'institut gfs.Berna mussà ch'il suveran svizzer avess votà l'entschatta d'avust cun 75% gea a l’iniziativa. In'approvaziun fitg auta congualà cun auters emprims barometers.

La populaziun na saja simplamain anc betg infurmada endretg, di Schneider-Ammann. Cura che quai saja il cas, saja el segir ch'il resultat giaja vers in na.

Sche Johann Schneider-Ammann vegn da persvader la populaziun u sch'ils iniziants fan la cursa, sa mussa la dumengia da votaziun ils 23 settember.

RR actualitad 12:00