Adina dapli glieud surtut quella pli giuvna s’infurmescha be pli en medias socialas. Questa uschenumnada «plattafurmisaziun» tras Google e Facebook mettia las redacziuns professiunalas sut squitsch.
Funcziun da controlla tras redacziuns professiunalas «pli impurtanta che mai»
Il squitsch resultia numnadamain dal fatg, ch’adina dapli raps da reclama giajan tar ils intermediaturs tecnics globals e betg pli tar las chasas da medias.
Quai succeda en ina situaziun, nua che redacziuns professiunalas che surpiglian ina funcziun da controlla en la tschungla d’infurmaziuns fissan «pli impurtantas che mai» concludan ils experts.
Qualitad tar ils gronds è sa meglierada
La scena da medias en la rait è en la Svizra tudestga per 71% en ils mauns da trais purschiders professiunals – numnadamain da Ringier, Tamedia e la SRG SSR. En la Romandie ed en il Tessin è la dominanza dals gronds anc pli explicita.
En ina cumparegliaziun da trais onns attesteschan ils experts dentant als purschiders professiunals dad avair ameglierà la qualitad da lur rapportaziuns.
Blers novs, dentant tuttina be ina «pseudo-diversitad»
Sper las chasas da medias tradiziunalas s’etableschan pli e pli purschiders novs. Intgins dad els accumpleschian ils criteris da qualitad, auters dentant betg, di Mark Eisenegger, president da l’institut da perscrutaziun «Publicitad e societad» da l’universitad da Turitg.
Perquai discurrissan els en lur publicaziun dad ina «pseudo-diversitad».
RR novitads 15:00