- Sin la Schwägalp (AR) è ina lavina ida a val la gievgia suentermezdi.
- Trais persunas èn vegnidas blessadas.
- Il venderdi han las autoritads smess da tschertgar persunas. I n'aveva er betg dà annunzias da persunas sparidas.
- La lavina ha donnegià in hotel, la chascharia e la fermada dal bus.
Sin la Schwägalp en il chantun Appenzell Dadora è la gievgia curt suenter las 16:30 ida giu ina lavina. Las massas da naiv èn penetradas en il restaurant da l'hotel Säntis ed han sutterrà 25 autos ch'eran parcads davant l'hotel. Trais persunas èn vegnidas blessadas levamain.
Naginas annunzias da spariziun
Sco la Polizia chantunala communitgescha, han els smess il venderdi la tschertga suenter persunas che pudessan esser sutterradas sut las massas da naiv. Annunzias da persunas sparidas n'aveva quai mai dà, uschia che las autoritads han decis da smetter cun la tschertga. Il persunal ed ils giast da l'hotel sajan tuts chattads. Sonda cuntinueschian las lavurs da rumida cun maschinas grondas ed a maun. La naiv vegnia rumida ord la chasada, e vehichels duajan vegnir liberads da la naiv. Quant grond ch’il donn è n’è anc betg enconuschent.
Evacuà giasts d'hotel
Giasts da l'hotel e dal restaurant ch'hajan vulì bandunar la Schwägalp, sajan vegnidas manadas la notg cun bus giun la val. Ultra da quai saja ina chasa da vacanzas vegnida evacuada per motivs da segirezza. En tut haja la polizia evacuà 75 persunas da la Schwägalp. Ils giast da l'hotel ch'han passentà la notg anc sin la Schwägalp èn entant vegnids transportads giu en la val, communitgescha la Polizia chantunala.
La via da Schwägalp è entant puspè libra per il traffic. L'access a la staziun da val da la pendiculara dal Säntis ed a l'hotel da muntogna, nua che la lavina è ida giu resta dentant vinavant serrà per tut il traffic.
RR novitads 20:00++