En Glaruna na vegn la populaziun da Schwanden betg a paus. Paucas emnas suenter il return en lur chasas, ha la vischnanca puspè evacuà pliras persunas. Suenter in ulteriur sbuvaditsch tras daratgadas, èn radund 30 persunas stadas isoladas e bloccadas en lur chasas. La glitta fitg rara è culada tras il quartier d’abitar fin en il flum Linth, ha ditg il president communal Hansruedi Forrer. Las forzas d'intervenziun han impedì cun satgs da sablun che la glitta entra en las chasas.
Return a chasa è intschert
Las radund 30 persunas ch'èn puspè vegnidas evacuadas a Schwanden suenter ils sbuvaditschs da venderdi na pon probabel betg pli turnar en lur chasas enfin la fin da l'onn. Cura che quai saja il cas n'ha il schef dal stab da la vischnanca dentant betg pudì dir. Las 5 persunas ch'avevan l'emprim renvià da bandunar lur chasas, hajan entant er bandunà il territori.
La fin d'avust avevan duas bovas gia destruì pliras chasas a Schwanden, uschia che la populaziun era vegnida evacuada. L'emna passada era vegnì enconuschent che 40 persunas na pon mai pli turnar en lur chasas destruidas ubain che han tals donns ch'ins sto spazzà quellas.
Betg d’excluder in eveniment pli grond
Anc adina smanatschan 60'000 meters cubics material da ruschnar a val – dubel uschè bler sco la fin d'avust ch’aveva destruì e donnegià insaquantas chasas. Cun la plievgia permanenta na saja betg d'excluder che anc ina giada pli grondas quantitads cuntanschian ils proxims dis il territori d'abitar. Il quartier pertutgà sa chatta be paucs meters davent da l'uschenumnada zona cotschna, nua che las bovas da l'avust avevan fatg ils pli gronds donns.
