En connex cun taglias betg pajadas aveva l'uffizi da taglia turitgais incumbensà l'Uffizi da scussiun Malögia da segirar valurs da facultad en l'autezza da 140 milliuns francs. Uss ha il Tribunal federal confermà quest pass. Ed er ina decisiun da la Dretgira dal chantun Grischun cunter l'hotelier e commerziant d'art Schwarzenbach en quest cas. L'hotelier aveva argumentà ch'i na saja betg stà correct da surdar ad in uffizi da scussiun questa incumbensa.
Largia evidenta
Las regulaziuns da la lescha na prevesian betg uschè in agir en tals cas, scriva il Tribunal federal. I sa tractia dentant d'ina «largia evidenta» en la lescha, che na saja betg stada previsa. Analog a las regulaziuns tar stumaziuns possian ins execuir in arrest en uschè ina moda e maniera.
Da tegnair enavos ils 140 milliuns francs, duai garantir ch'ils daners che Schwarzenbach stoppia anc pajar taglia, vegnian er cuverts. L'uffizi da taglia turitgais, ha avert il 2015 ina prodecura per survegnir ils daners da taglia da Schwarzenbach dals onns 2005 fin 2009. Il process è vegnì serrà giu il 2016 cun in'ordinaziun. Er il schaner 2016 ha la dretgira relaschà ina stimaziun per la taglia tranter il 2010 fin 2015.
