Il venderdi è il president da la Confederaziun Alain Berset s'inscuntrà en l’Austria cun la regenza dal pajais vischin. Alexander Van der Bellen, president da la Confederaziun austriaca, ha empermess da sustegnair la Svizra per puspè pudair sa participar al program scientific «Horizon Europe».
Svizra è actualmain exclusa
La Svizra è dapi curt exclusa dal Forum europeic per la strategia davart infrastructura da perscrutaziun (ESFRI). Perquai pretenda ina maisa radunda da la scienza svizra da la politica ina schliaziun pragmatica cun l’Uniun europeica.
L'associaziun al program scientific «Horizon Europe» da l'UE è tenor statuts da l'ESFRI premissa per la participaziun a quest forum. L'Uniun europeica ha dentant midà il status da la Svizra, suenter che quella ha rut giu las tractativas davart la cunvegna da basa cun l'UE. La Svizra vala uschia be pli sco stadi terz betg-associà.
Sa participar a sesidas ed autras activitads dal forum na saja uschia betg pussaivel, communitgescha l'Academia da las scienzas natiralas Svizra. La Svizra perdia cun quai ina pussaivladad impurtanta per influenzar il spazi da perscrutaziun europeic, sco Hans Rudolf Ott, parsura da la maisa radunda, di.
