«The different diagnostic values of polysomnographies at low and at moderate altitude – a randomized crossover trial.» Quai è il titel da la lavur da Nadja Deflorin (27) en il rom da sia dissertaziun. Per rumantsch ed en ina furma in pau pli simpla vul quai dir: «Influenza da l'autezza moderata sin l’analisa da la sien.»
Nadja Deflorin ch’è creschida si a Mustér e ch'ha terminà il studi da medischina avant in onn, lavura vi da quest studi en l'Ospital chantunal Grischun a Cuira. «La finamira dal studi è d’analisar la sien sin in’autezza moderata da sur 1000 meters sur mar en cumparegliaziun cun ina pli bassa sin 600 meters sur mar», di Nadja Deflorin ch’è engaschada il mument en la partiziun da la pneumologia.
Analisar la sien
«Igl ha dà studis ch'han intercurrì la sien da persunas sur 2000 meters sur mar. En quels è vegnì constatà che la sien è pli superficiala, pli aut ch’ins dormia e ch’i dat pli bleras interrupziuns dal trair flad, uschenumnadas apneas da la sien. Quai è il cas era tar persunas ch’èn uschiglio saunas», di Nadja Deflorin. Quai po avair differents motivs: «Pli ad aut ch’ins è, e pli pauc oxigen che l’aria ha. Medemamein sa reducescha la pressiun da l’aria. Tut quai ha in’influenza sin il corp.» Il studi fan Deflorin e las persunas che lavuran per il studi medemamain tar las persunas a chasa ed en in labor spezial.
Apneas fan savens stanchel durant il di
«Blera glieud na realisescha gnanc che la sien vegn disturbada la notg d’interrupziuns dal trair flad. Las persunas pertutgadas èn dentant savens stanclas il di ora pervia da quest disturbi. Quai po schizunt manar a depressiuns», di Nadja Deflorin. La partenaria u il partenari en il letg dasperas possian eventualmain realisar quai, essend che la persuna pertutgada na tira betg flad per in mument e reagescha lu mintgamai cun ina reacziun da sa dasdar per puspè survegnir aria.