Per l'emprima giada ha ella examinà las finamiras da furmaziun che la Conferenza ha fixà il 2011 en las spartas matematica e lingua. Las examinaziuns han ins fatg tar passa 20'000 scolaras e scolars.
Cuntrari al studi da Pisa il 2015, nua che scolaras e scolars svizzers eran en il rom matematica a la testa en l'Europa, na datti questa giada be pauc laud. Sulet trais da tschintg giuvenils cuntanschan las cumpetenzas fundamentalas. Las differenzas tranter ils chantuns èn considerablas. A la cua da la rangaziun da matematica èn ils scolars dal chantun Basilea-Citad nua che be 43% da tut ils scolars cuntanschan las finamiras. Ils megliers quintists èn quels dal chantun Friburg cun 83%. Il Grischun è levet sur la media svizra cun 64%.
Cumpetenzas linguisticas èn meglras
Tar las linguas èn las cumpetenzas dals scolars en general bunas. Là ha il studi examinà la savida en la lingua da scola ed en l'emprima lingua estra a la fin da la scola primara. 90% da las scolaras e dals scolars san leger bain en la lingua da scola. Il meglier legian er qua ils scolars dal chantun Friburg, a la cua èn quels da Glaruna. Il Grischun è cun 93% sur la media svizra. L'ortografia damognan en media tranter 80 - 89% da las scolaras e dals scolars e medemas cifras datti cun chapir quai ch'ils uffants audan (tadlar e chapir). Main bain è la cumpetenza da chapir quai che vegn legì (leger e chapir).
RR novitads 11:00