Ils scolars cun ragischs en l'exteriur che visitan scolas svizras mussan sumegliantas prestaziuns sco quels che visitan scolas en ils pajais da l'Organisaziun da cooperaziun e svilup economic en Europa (OECD) u da l'Uniun europeica.
Uschia han 58% enconuschientschas da basa en leger, scienzas natiralas e matematica. La media tar l'OECD è tar 54% e quella da l'Uniun europeica è 55%.
Pli motivads ch'ils scolars svizzers
Dentant resulta tenor in’evaluaziun speziala dal studi da Pisa ch'ils scolars cun ragischs da l'exteriur èn en media pli motivads ch'ils scolars svizzers. Uschia inditgeschan mo 33% dals scolars svizzers dad esser motivads. Tar ils scolars cun ragischs da l'exteriur inditgescha prest la mesadad, numnadamain 46%, dad esser motivà.
En cumparegliaziun cun l'OECD e l'Uniun europeica è quai però anc adina bass: Uschia èn 70% dals scolars migrants en ils pajais da l'OECD e 66% da l'Uniun europeica motivads.
Pauc pli che la mesadad sa chatta integrada
Mo 54% dals scolars migrants sa chattan dentant integrads. Tranter 2003 e 2015 è quel dumber sa reducì per 17%.
Cun la situaziun da lur vita è dentant la gronda part cuntenta. Uschia inditgeschan trais da quatter almain in 7 tar la dumonda, quant cuntents ch'els sajan cun lur vita sin ina scala da 0 enfin 10. En l'OECD ed en l'Uniun europeica è la media radund tar 69% – damai pli bassa.
RR novitads 18:00